Ougenweide - Palästina Lied lyrics

Allererst lebe ich mir werde Sit min sündig ouge siht Daz reine lant und ouch die erde Der man so vil eren giht Mirst geschehen des ich ie bat Ich bin komen an die stat Da got mennischlichen trat Schoeniu lant riche unde here Swaz ich der noch han gesehen So bist duz ir aller ere Waz ist wunders hie geschehen Daz ein maget ein kint gebar Here über aller engel schar Was daz nicht ein wunder gar Hie liez er sich reine toufen Daz der mensche reine si Sit liez er sich hie verkoufen Daz wir eigen werden fri Anders waeren wir verlorn Wol dir, sper, kriuz unde dorn We dir, heiden! Deist dir zorn In diz lant hat er gesprochen Einen angeslichen tac Da diu witewe wirt gerochen Und der weise klagen mac Und der arme den gewalt Der da wirt an ime gestalt Wol im dort, der hie vergalt Kristen, juden unde heiden Jehent daz diz ir erbe si Got müez ez ze rehte scheiden Durch die sine namen dri Al diu werlt diu stritet her Wir sin an der rehten ger Reht ist daz er uns gewer