Author Unknown - Prose Merlin - The Baron's Revolt lyrics

[Summary. In August Arthur convenes his royal court at the city of Carlion, with all the barons in attendance. Arthur honors the barons and offers them gifts; but the barons insult Arthur, refuse his gifts, and order him to leave the country or be k**ed. Eluding them, Arthur takes refuge in the fortress of Carlion. After fifteen days Merlin arrives on the scene and announces his support for Arthur. He tells the barons that Arthur is not Antor's son but is actually Uterpendragon's son, and Ulfin verifies Merlin's account of Arthur's birth. But the barons, continuing their opposition to Arthur, declare that no bas- tard will ever be their king; they prepare themselves for battle. Arthur has only a few knights on his side, but the townspeople offer their support. Merlin then confronts the a**embled barons. Fols. 35v (line 27)-37v (line 16).] And as thei spake thus, com Merlin to hem and seide, "Sirs, what is that ye purpose to do? Y do yow to wite ye will gete yourself the werse and shull lese theron more than ye shull wynne; for God will shewe soche wreche that ye shull be full rebuked and foule shamed, the moste quyente of yow alle. For ye beth agein hym with wronge of the eleccion that the archebisshop hath made, like as ye have seyn." "Now hath the enchauntor well spoken!" seide the barouns, and begonne for to jape oon to another. And whan Merlin saugh thei made japes of his wordes, he returned anoon agein to Kynge Arthur and bad hym he sholde nothinge be dismaied, for he sholde not drede hem alle; for he wolde hym helpe so that the moste hardy of hem in the oste, er it were nyght, sholde wiesshe to be at home in his owne contree. Than Arthur toke Merlyn and ledde hym aparte, and the archebisshop and Antor and Kay and Ulfyn and Bretell; these seven were prevely in counseile. And than seide Arthur to Merlin: "Dere frende Merlin, I have herde say thatye loved well my fader Uterpendragon as longe as he was lyvinge; and therfore I praye yow, for the love of God and for norture, that ye will me counseile in this matere, as ye knowe well these barouns do me grete wronge. And I wolde fayn and it plesed yow to be with me as ye were with my fader; and knowe it for trouthe that I shall never do thinge that ought yow to displese to my power; and ye have me holpen in my yowthe and in my tendirnesse, and therfore I praye yow helpe to mayntene and to strengthe me to kepe my londe; for by yow and by my fader the archebisshop, and Antor that hath me norisshed, am I come to this that I am atte. And therfore, at the reverense of God, have pité of me and of the mene peple that alle shull be distroied but God sette remedye." "Now dismaye yow nothinge, sir," seide Merlin, "for ye shull not have no fere of hem. But as soone as ye be deliverid of these barouns that beth here now come for to a**aile yow, do that I shall yow rede and counseile. This is the trouthe, that the Knyghtes of the Round Table that was stablisshed and founded in the tyme of Uterpendragon youre fader -- on whos soule God have mercy -- thei be gon to sojourne to their owne contrees, for the grete untrouthe that thei syen in this reame. This is in the reame of Kynge Leodegan of Tamalide, that is an olde man and his wif is deed, and of alle his childeren is lefte but oon doughter, to whom the reame shall falle after his deth. And the Kynge Leodegan hath grete werre agein the Kynge Ryon, that is kynge of the londe of geauntes and of the londe of pastures, wherin dar noon inhabite for diverse aventures and merveiles that ther fallith bothe day and nyght. "This Kynge Rion of whom I speke is right myghty of londe and of peple, and full of high prowesse, and is right a crewell man. And he hath conquered by force twenty kynges crowned, fro whom he hath taken alle their berdes by force and in dispite, and sette hem in a mantell whiche he maketh every day a knyght to holde afore hym atte mete at alle tymes whan he holdeth courte rioall; and he hath sworn that he shall never finysshe till he have conquereth thirty kynges. This kynge werreth upon Leodegan and in his londe doth grete damage. ThisLeodegan marcheth to thy reame, and yef he lese his londe, thow shalt lese thyn after. And undirstonde well that he sholde have loste his londe longe er this tyme, ne were the Knyghtes of the Rounde Table that mayntened his werre, for he is now in grete age. And therfore I rede that thow go and serve hym a while, the Kynge Leodegan, and he shall yeve thee his doughter to be thy wif, to whom the reame longeth after his deth. And she is right feire and yonge, and the wisest lady of the worlde of so yonge age. And of thy londe have thow no doute, for eche of these barouns that now werreth upon thee, thei shull have so moche to do that litill shull thei forfete in thy londe, but pa**inge thourgh the playn contrees. "But er thow go, do garnysshe thy forteresses of every citee and every castell with vitayle and men and stuffe of other artrye. And the archebisshop shall a- curse alle tho that in thy londe eny thinge forfete agein thee or in thy contree. And the archebisshop hymself shall shewe the cursynge in sight of alle the barouns that now ben here, and comaunde alle the clergie to do the same in heringe of hem alle. And soone after ye shall se soche thinges, by the helpe of God, that the proudest of hem shall be affraide. And wite ye well that I will be redy with yow in every grete nede. And whan I crye to yow, `Now upon hem,' set forth boldely and smyte in amonge hem, and wite it verily that thei shull be so abaisshed that litill thei shall yow disese, but alle thei shull be fayn to fle as discounfite." "Sire," seide the kynge, "gramercy." And than thei departed. And the archebisshop wente upon the walles on high, and the Kynge Arthur dide his peple make hem redy; and [thei] lepe on horse and in that manerwise thei abide longe tyme. And Merlin made to Kynge Arthur a baner wherein was grete significacion, for therin was a dragon which he made sette on a spere, and be semblaunce he caste oute of his mouth fire and flame. And he hadde a grete taile and a longe. This dragon no man cowde wite where Merlin it hadde, and it was merveilouse light and mevable. And whan it was set on a launce thei beheilde it for grete merveile. Than toke the kynge the dragon and yaf it to Kay his stiwarde, in soche forwarde that he be chef banerer of the reame of Logres ever while hislif doth dure. Thus arraied thys mayné the Kynge Arthur, and abode in soche maner on horsbak before the yate before the paleis. And the barouns made picche her teynte and pavelouns thourgh the medowes that were large and faire. And whan the archebisshop that saugh, he asked what thei were come to seche so armed. And thei seide that thei were come to take the maister toure, which thei wolde no man sholde be inne but by hem. Than the archebisshop yaf the scentence full dolerouse, and cursed of God and with all his power alle tho that in the londe dide eny forfet, or were agein the Kynge Arthur. And the barons seide that for eny cursinge, thei wolde not cesse till thei hadde dryve the kynge oute of the londe. And yef thei myght hym take, thei lete hym knowe that he sholde not escape withoute the deth. And whanne Merlin undirstode their bobaunce, he caste his enchauntement so that alle their logges and pavilouns were alle on fire aflame. And thei therof were so abaisshed that hem thought longe er thei myght gete oute into the medowes fro the fyre. But er thei myght come ther thei caught grete harme, and foule were thei skorched with the fier. Merlin ran to the kynge and seide, "Sir, now hastely upon them!" And thei spronge oute at the yate as moche as theire horse myght renne, the speres on their a**eles, theire sheldes before her bristes. And thei were so abaisshed and affraide that the moste hardy of hem wolde fain have be thens, for thei wende not that ther hadde be so moche peple withinne. For thei withoute were sodenly many of hem born down with speres, and moche peple slain; for thei were so astoned with the hete of the fier that theire deffence was but symple. Ther was grete slaughter of men and horse. Ther dide Arthur merveillouse dedes of armes that gretly he was beholden, bothe on that oon part and on the tother. He overthrewe knyghtes, bothe horse and man, with stroke of spere and of swerde. And therto hadde the princes and barouns grete envye, and a**embled hem togeder, and seide that it were grete shame yef he so escaped. And thei werenoble knyghtes and hardy, and full of high prowesse, and many of hem carnell frendes. Than seyde Kynge Ventres of Garlot that he wolde hem delyvere in short tyme, for yef Arthur oonly were deed, the werre of the remenaunt were soone fynysshed. "Goth on," seide the othir prynces, "and yef ye have myster we shall yow socoure." Therwith departed the Kynge Ventres and his company, that was a moche man of body, and a gode knyght and yonge, of prime barbe. And he was mervelouse stronge, and he helde a shorte grete-growen spere, sharp grounden, and rode agein Arthur. Whan Arthur saugh hym come, he dressed agein hym his horse hede, and griped a grete aisshen spere, the heede sharp trenchaunt of stiell, than smote the horse with the spores that it ran so faste and so briaunt that alle hadden merveile that it behelden. And he afficched hym so in the sturopes that the horse bakke bente; and [thei] smote togeder so hetely upon the sheldes that thei preced thourgh. The Kynge Ventres brake his spere upon Kynge Arthur, and Arthur smot hym agein so sore that he bar hym over the horse crompe, and his legges upright, that the erthe re- bounded; but he hadde noon other hurte. And whan the Kynge Loth of Orkanye saugh the Kynge Ventres overthrowen, he was wroth and sorowfull, for thei were bothe cosin germains, and also thei hadde wedded two sustres. Than smote he the horse with spores agein Arthur, that yet hadde he his spere hoill. And whan he saugh the comynge of Kynge Loth, he come agein with grete hardinesse, as he that of hym hadde no dowte. And [thei] mette togeder on the sheldis so that the horse ne myght not pa**e ferther till the tymbres were broken. And on the pa**inge forth thei hurtelid togeder so fiercely with sheldes and with her beyes and her helmes that the Kynge Loth was so astonyed that he fley over his horse crowpe. Than aroos grete noyse and cry on the oon part and the tother. Ther began a grete stoure and merveillouse. The knyghtes that were with Kynge Ventres peyned hem sore to socoure their lorde, and so dide the knyghtes of Kynge Loth. And Arthur's knyghtes peyned hem sore to helpe Arthur, and to take and holde these other two kynges. And so began the medlé on bothe parteis crewell and fellenouse. But with grete peyne were these two kynges rescowed and horsed agein. Whan Arthur was releved, he drowgh his swerde oute of skabrek, whiche was so cler and bright shynynge, as thei semed that it behelden, that it glistred as it hadde be the brightnesse of twenty tapres brennynge. And it was the same swerde that he toke oute of the ston; and the letteres that were write on the swerde seide that the right name was cleped Escaliboure, whiche is a name in Ebrewe that is to sey in Englissh, "kyttynge iren, tymber, and steill." And the letteres seide trewe, as ye shall heeren hereafter. Whan the Kynge Arthur hadde drawen oute his swerde, he smote into the prese theras he saugh thikkeste, and smote a knyght on the sholder so that he made it discendir from the body. The stroke was grete and the swerde trenchaunt, so that he slyt asonder the sadell and the chyne of the horse, that bothe the knyght and the horse fill on an hepe. And than he smote aboute hym grete strokes, bothe on the lefte syde and on the right side, and made so grete occision aboute hym that all that it syen helde it grete merveile, and ne durst not abide his strokes, but made wey and voided place for drede of his swerde and of his fell strokes. Whan the seven kynges saugh the damage and the grete losse that they hadde thourgh hym, thei were wroth and right sorowfull, and seyde eche to other, "Now let us alle sette on hym attones and bere hym down to the erthe, for elles may we nothynge conquere." And to this thei acorded. Than thei henten speres grete and rude, and ronnen agein hym with as grete ranndon as their horse myght hem bere, and smyten hym on the shelde and on the haubrek; but [it] is so stronge and sure that no mayle ne perced. But thei bar to hym so harde that Arthur was throwe to erthe, bothe he and his horse on oon hepe. And whan Kay and Antor and Ulfin and Bretell and other of Arthur's frendes syen this, Antor hasted hym to Kynge Carados and met hym so hedylyche with a grete spere that bothe the tymbir and stelen heede shewed thourgh his shuldre, and threwe bothe hym and his horse to the erthe, and [he] lay longe in swowne. And Ulfin and Kynge Ventres of Garlot mette so sore togeder that ether bar other to the grounde, and the horse upon hem. And the Kynge Ydiers and Bretell brake their spers that oon upon the tother, withoute more harme doynge. And alle the tother barouns abode upon the Kynge Arthur that yet lay at the erthe all stonyed, and thei smote on his helme grete strokes and pesaunt, so that thei made hym moche more astonyd. And whan Kay saugh that the kynge was at so grete myschef, he griped his swerde and come ther the kynge was overthrowen, and smote the Kynge Loth upon the helme that he made hym stoupe on the arson of his sadell, and leyde on hym so grete strokes that Loth all astonyed fill to the grounde. Than come thei to the rescowe, bothe on the oon and on the tother. Ther was grete bataile and stronge stour and grete slaughter, bothe of men and horse. And so peyned thei that were with Kynge Arthur that thei have hym re- mounted on his horse. But firste hadde thei grete payne and traveile and grete losse, for the meene peple of the town were come oute with all wepen that thei myght have deffensable. And the cry and the noyse rose thourgh all the contré, so that alle the commons hasted thider all that myghten, and seiden that thei wolden alle be deed on the same grounde er that Kyng Arthur hadde eny greef, as longe as thei myghten hym deffende. Than they smyten in amonge the preesse of the seven kynges that many they dide sle and wounde, and so put hem to flight whether they wolde or noon. And so thei yede discounfit. But thei seiden thei sholde never have gladnesse till they were venged, and that they wolde not take of Arthur but his heed. The Kynge Arthur, that was full wrothe, and Kay hem chased fercely before alle other. And so fill it that Arthur overtoke Kynge Ydiers and wende to smyte hym on the helme, but the horse bar hym to faste, so that the stroke descended on the horse and slyt hym even asondre behynde the sadill; and Ydiers and his horse blusshet to the erthe, wherefore his men were gretely affraied leste he hadde be slain, and returned hym to rescowe. Ther began the stour grete and merveillouse, for that oon part peyned to withholde and to take Kynge Ydiers, and on the tother syde thei peyned hym to rescowe; and so was ther do more damage and harme than hadde be all the day before. For ther was neyther horse ne man that myght endure agein the swerde of Arthur that was cleped Calibourne, that was all blody of brain and blode so that his armes were so steyned that nought was sein but all reade. Nevertheles, so peyned Ydiers men that they have hym remounted on horsebak; and so ben thei departed discounfited, and the chase lasted longe tyme. And so the seven kynges losten inough, for of all the harneys that thei hade brought thider, thei hadde not with hem the valew of two pence, that all ne was brente with the fier that Merlin made discende amonge theire tentes and pavelouns, saf only the vessels of golde and silver and the money.